Ўзбекистон “TTG Travel Experience 2026” халқаро туризм кўргазмасида иштирок этди
Жорий йилнинг 14–16 октябрь кунлари Италиянинг Римини шаҳрида нуфузли халқаро туризм кўргазмаларидан бири — “TTG Travel Experience 2026” бўлиб ўтди. Унда Ўзбекистон Республикаси Туризм қўмитаси томонидан ташкил этилган миллий стенд билан мамлакатимиз ҳам иштирок этиб, Ўзбекистоннинг туристик салоҳияти ва халқаро туризм бозоридаги имкониятларини намойиш этди.
Кўргазма туризм соҳаси мутахассислари, туроператорлар, сайёҳлик компаниялари ва халқаро ҳамкорларни бир майдонда жамлади. Тадбир янги ишбилармонлик алоқаларини ўрнатиш, ҳамкорликни ривожлантириш ва Ўзбекистонга хорижий сайёҳларни жалб этиш имкониятларини кенгайтириш учун муҳим платформа бўлиб хизмат қилди.
Кўргазманинг биринчи куни Ўзбекистон миллий стендининг очилиш маросими бўлиб ўтди. Тадбир давомида мамлакатимизнинг туристик салоҳиятини халқаро миқёсда кенг тарғиб қилиш, Ўзбекистоннинг жозибадор туристик йўналиш сифатидаги имижини мустаҳкамлаш ҳамда хорижий ҳамкорлар билан ўзаро манфаатли алоқаларни ривожлантиришга алоҳида эътибор қаратилди.
Миллий стенд доирасида кўргазмада Ўзбекистоннинг 16 та туроператори ҳамда “Uzbekistan Airways” авиакомпанияси вакиллари иштирок этди. Тадбирнинг биринчи кунида хорижий туроператорлар, сайёҳлик компаниялари ва соҳа вакиллари билан қарийб 400 та B2B учрашув ўтказилди. Ушбу учрашувлар янги ишбилармонлик алоқаларини йўлга қўйиш, истиқболли келишувларга эришиш ва Ўзбекистонга сайёҳлар оқимини ошириш учун муҳим имкониятлар яратди.
Миллий стендда мамлакатимизнинг туристик имкониятларини акс эттирувчи ахборот ва реклама материаллари, видеороликлар ҳамда миллий ҳунармандчилик намуналари намойиш этилди. Кўргазма иштирокчилари ва ташриф буюрувчилар Ўзбекистоннинг бой тарихий-маданий мероси, миллий анъаналари, маданий қадриятлари ва туризмни ривожлантириш борасидаги замонавий имкониятлари билан яқиндан танишиш имконига эга бўлди.
Ўзбекистоннинг “TTG Travel Experience 2026” кўргазмасидаги иштироки мамлакатимизнинг халқаро туризм бозоридаги мавқеини мустаҳкамлаш, хорижий сайёҳларни жалб этиш, шунингдек, Италия ва бошқа давлатлар билан туризм соҳасидаги ҳамкорликни янада кенгайтиришда муҳим аҳамият касб этди.
Шу тариқа, халқаро кўргазмада иштирок этиш янги ишбилармонлик алоқаларини шакллантириш, истиқболли лойиҳаларни ривожлантириш ва Ўзбекистоннинг жозибадор туристик йўналиш сифатидаги халқаро имижини янада мустаҳкамлашга хизмат қилди.
